(إذا جاء رمضان ...فتحت أبواب الجنة...وأغلقت أبواب النار...وأزلفت الشياطين)
(ليلة القدر خير من ألف شهر)
(كان الرسول إذا قارب شهر رمضان أكثر من دعاء واحد: اللهم بلغنا رمضان)
(لو علم الناس فضل شهر رمضان لتمنوا أن تكون السنة كلها رمضان)
(خاب وخسر...خاب وخسر...خاب وخسر....من أدركه رمضان ولم تغفر كل ذنوبه)
(رمضان إلى رمضان...مكفر لما بينهم)
كل ده كلام اتقال فى فضل شهر رمضان وانا لا اعتقد انه محتاج حتى لشرح أو تفصيل لأنه كله واضح ومبين قد ايه الشهر ده مينفعش يعدى كده بالساهل زى أى شهر غيره...الناس فى مصر فى رمضان تلاقيهم راكبين المواصلات وكل واحد تقريبا - من المسلمين طبعا- فى إيده مصحف ومعظم الناس مشغله قرآن كريم فى عربياتهم وساعة الفطار كل الناس قاعدة ساكتة وموائد الرحمن مليانة وغيره وغيره من الطقوس اللى بتميز رمضان عن بالقى الأشهر فى السنة الهجرية
التليفزيون بقة فى رمضان كأنه بينقل إرسال من كوكب تانى مفيهوش رمضان...تلاقى قبل الفطار فترة شغل الموظفين جايب حاجات رخمة أو بيعيد اللى كان جايبه الليلة اللى قبلها وبعد ميعاد رجوع الموظفين تلاقيه يا إما جايب الأفلام اللى الناس ريقها بينشف على ان التليفزيون يعرضها طول السنة يا إما جايب الأفلام اللى أحداثها تقريبا كلها بنات لابسة مايوهات وبعد الفطار خد عندك مسلسلات لحد ما تنام وانت بتتفرج والمسلسلات لعلمك هتبقى لسه مخلصتش
الجوامع فى رمضان زى ما يكون الأئمة بتوعها بينتقموا من الناس فى الصلاة ...طبعا كلنا عارفين ان بعد صلاة العشاء فيه صلاة التراويح واللى بتكون من 4 إلى 20 ركعة فى اليوم لكن فى المنطقة بتاعتى معظم الجوامع متفقة انها تكون 8 ركعات إلى جانب ركعتى الشفع وركعة الوتر....المهم...ييجى الإمام ويروح رازع الجزء كله فى الركعات الثمانية بمعدل ربع حزب فى الركعة بس المشكلة مش فى كده وانما المشكلة انه شايف نفسه صوته حلو وجميل وبيقسم مع ان الناس معظمها بيبقوا نايميين وراه أو بيهرشوا أو بيبصوا على حاجة...وهكذا
اللى انا عايز اقوله هنا أولا ان اللى عايز يطول فى القراءة لازم يكون متأكد ان صوته مميز وممتع مش مجرد بيقرأ وخلاص إلى جانب انه لازم يكون عنده حاسة فى تغيير نبرات صوته والإطالة أو التقصير وكل ما هو يشد المستمع ويخليه على طول صاحى معاه
ثانيا اللى فاكر نفسه منهم بيعود الناس على الوقفة فى الجامع والصلاة فيه...أحب اقوله ان سيادتك اللى بيصلى التراويح غالبا هو اللى أساسا برة رمضان بيصلى فى الجامع فهو مش محتاج ده والنسبة البسيطة اللى بتستنى لصلاة التراويح فى المسجدوهى بره رمضان مبتصليش فيه - أو مبتصليش خالص- دول مش هيتعودوا على وقفة الجامع دول ح يزهقوا مع أول ركعتين هيسلموا ويمشوا
ولذلك نرجو منهم الرأفة فى اللى جاى يصلى
وعموما لو الواحد يقدر يخلص فى العبادة في رمضان...والله يبقى كسب كتير جدا وربنا يوفقنا جميعا لما يحبه ويرضاه
