وفاة والد خطيبتى

الخميس 25/06/2009

توفى إلى رحمة الله تعالى (رضا مبروك عبد الفتاح نجم) والد منال بعد معاناة مع سرطان المعدة لمدة سنة تقريباً

انا لم تتاح لى الفرصة لمعرفته جيداً ولكن - والحق يقال- اننى كنت احبه واحترمه وحتى فى العزاء من خلال كلام الناس عرفت انه كان محبوباً من الجميع

انا محظوظ لأنى كنت من آخر الذين تحدث معهم ليلة وفاته (مع زوجته ومنال) لأننا كنا آخر من زاره قبل وفاته بحوالى 5 ساعات

اللهم ارحم روحه واسكنه جنتك بالطيب من اعماله واعف عن خطاياه ... انك انت الغفار التواب

لقد كان حقاً من الذين يشعرونك بالحنان والحب الأبوى الذى ليس له مثيل

aren't we the best couple

Marwan & Manal

عمــــــر شريــــــــــف

عمر شريف محمد السيد

ابن شريف محمد السيد - جارى وصديقى وصاحبى

شريف اللى طول عمرنا بنعتبره أخونا الكبير وهو اللى بيخطط معانا لمستقبلنا وساعات بنحس انه بيربينا

ده ساعات حتى بيزعق فينا كأنه اب لينا

أخيرا وصل الى الدنيا مولود من انتاج شلتنا وهو "عمر" ابن شريف فى يوم الأربعاء 08/04/2009

يا رب تفرح بيه يا شريف ويتربى فى عزَك ان شاء الله

احنا كبرنا يا جدعان

شريف اللى كان بيلعب معانا فى الشارع بالكرة وبننزل فى العيد نفرقع بمب بقى أب

ايييييييييييييييييه .......... وتستمر الحياة

هى ناقصة

يعنى انا بقول انى بقيت ماشى جوة الحيط مش جنب الحيط
وداخل على مرحلة فى منتهى الحساسية ومحتاج فعلاً لكل جنيه ييجى
والاقى العالم وقع فى الأزمة الإقتصادية2009
هو العالم كله بيتآمر عليه انا ولا ايه؟
ايه الهبل ده
هى ناقصة؟؟؟!!!!!!!!! ولا انا اللى بقيت محظوظ قوى كده

ياللا .... برضه النيه الطيبة ان شاء الله ح تكسب
واحنا بنعمل اللى علينا وعلى رأى المثل

"اجرى يا بنى آدم جرى الوحوش .... ويا تلحق الميكروباص يا متلحقوش"

خطــــوبتــــى

فى 08/01/2009 والحمد لله تمت الخطوبة

واخيراً يا أحلى مونى بقينا مخطوبين ويا رب نفضل على طول مع بعض ونتجوز على طول يا أجمل عروسة وعلى فكرة كل الناس اللى جت بتهنيينى بيكى وانا عارف اننى فعلاً كسبت احلى بنت فى الدنيا ... يارب ربنا يخليكى ليَا ونعيش مع بعض احلى واجمل عروسين فى الدنيا وربنا يقدرنى واسعدك ويقدرك وتسعدينى

ح افضل احبك احبك احبك .... ولاعمرى هاقول على فين ياهوى

هو انا احلامى فى دنية حبك ... كان قلبى يطول نحلمها سوا

لو كل حبيب له حبيب وده حاله ... كان جاله كده وغنى له

نحن فى مصر الآن - بطريقة ما- الذين قال الله عز وجل فيهم

"إذا اردنا ان نهلك قريةٍ أمرنا مترفيها ففسقوا فيها فحق عليهم العذاب"

وهذا بالضبط ما يفعله المترفين من الدولة وحكامها واولى الأمر فيها بها

وأعتقد ان انجازان السيد المهندس / أحمد نظيف من قهر للشعب وكبت حرياته وإشاعة الفساد قدر المستطاع وتوجيه الوساطة الى جميع انشطة الدولة وتفعيلها فى الأماكن التى لم تكن قد وصلت اليها بعد قد نال استحسان السيد الرئيس ومن ثم فقد قرر سيادته ابقاء الحكومة النظيفة كما هى

اكتر حد

رقة طفل صغير وقلب مفيش حنيته

وعشانك اتغير لو قلبى هيطول جنته

كل كلام الدنيا مش ممكن يوصفك

لازم اللى يحبك يبقى زيك ويعرفك

انتى اكتر حد فى الدنيا هاندم عليه

وانتى اكتر حد عارف بقول كده ليه

وانتى اكتر حد نفسى المس ايديه

مشاعرنا بتتغير وانتى مشاعرك فيها ايه

بحلم بيكى وافكر وانا عارف نهايتى ايه

وامنع نفسى انى احبك وبحب غيرك

وادعى مكنش فى يوم عدى عديت فى تفكيرك