أول عربية فى حياتى

بعد ما لم يحدث نصيب فى الخطوبة اتجهت للتفكير الخاطئ وهو العند مع نفسى فوافقت أخويا شهـــــاب على اننا نشترى عربية وفعلا بدأنا ندور عن عربية لحد ما كنت بتكلم مع أيمــــــن وعرفت أن أبوه عايز يبيع العربية بتاعته....وبالفعل اتفقنا مع ابو أيمن واشترينا العربية بتاعته نيســــان صنـــــى 1999 والكلام ده كان فى 18/12/2006 وبعد 3 شهور بدأت مشاكل العربية المستعملة تبان ولكن مش دى المشكلة

المشكلة الحقيقية كانت فى الحوادث

ناس تقولك: دى واخدة عين .....ادبح عليها ان شالله أرنب أو فرخة. وناس تقولك: ابقى خلى بالك من المشاكل والسواقة فى مصر دى أصلها بنت كذا وكذا. وناس وناس ....وهكذا

العربية دى ساعة ما اشتريناها مكنش فى الأسرة الكريمة غير اثنين بيعرفوا يسوقوا: السيد الوالد والعبد لله ونظرا لظروفنا فكنت انا الوحيد اللى بيستخدم العربية

علشان مبقاش انانى ولا عيل كان لازم احاول تعليم اخواتى السواقة على الأقل اللى عايز يتعلم منهم وبالفعل لأن شهــــــــاب و رامـــــــــــى عندهم فكرة مسبقة قدروا يتعلموا السواقة بسرعة وان تميز شهـــــــــاب اكتر بظرا لأنه الأكبر ولأن رامــــــى بيخاف شوية وهو سايق لكنه برضة بيعرف الحمد لله دلوقتى

المهم عشان مطولش علي نفسى على الرغم من أن اخواتى حديثى التعلم وبابا مبيسوقش غير كل حين ومين إلا ان كل الحوادث اللى حصلت فى العربية كانت منى انا.....خرشمتها.....على رأى أحمد حلمى الممثل قطعت أمها....أول مرة كان كوستر شرطة خبطنى من الخلف لأنى فرملت فجأة (بس والله أنا فرملت لأن اللى قدامى فرمل فجأة وكنت هلبس فيه) لكن المهم النتيجة وهى ان الظهر اتطبق وشكلها بقى معفن ورغم ان الخبطة مكنتش جامدة إلا ان العربية بقى شكلها معفن من ورا....صدقونى مش غلطتى....المرة الثانية كنت راكن وقاعد فى العربية وكان فى واحدة ست كبيرة خارجة من ناى القضاه راكبة (بى ام الفئة الخامسة) المهم راحت خارجة ومش شايفة فحكت جنب العربية كله من اليمين ولما جيت اكلمها قالتلى انا لمستهالك خالص!!!!حسبى الله ونعم الوكيل....صدقونى مش غلطتى....المرة الثالثة كنت رايح اجيب خالى (مستر كيـــــم)بس ده الإسم الحركى من المطار وانا عند بيت الريس - الله يطولنا فى عمره- وقفت الإشارة فجأة وكان قدامى عربية حمراء 128 فيات وحاولت احود منها لقيت اليمين والشمال عربيت جاية بسرعة فدخلت زى مانا وعلى الرغم ان الخبطة مكنتش جامدة فيه إلا انها بوظت الوش كله....صدقونى هو اللى وقف فجأة.....المرة الرابعة كانت على الدائرى بتاع السلام وكمنت رايح أودى خالى من أكتوبر للمطار وطبعا عرفتوا انه مش خالى فعلا ده اسمه الحركى المهم العجلة اليمين ورا نامت وانا ع الطريق ولقيت العربية بتحدف شمال على مقطورة ماشية جنبى فاضطريت اعكس العجل كله يمين واترزعت فى الرصيف وبعدين قدرت اسيطر عليها والحمد لله لكن دى كانت نهاية الكاوتشين اليمين والجنوط بتاعتهم وده طبعا غير ترصيص وضبط زوايا واتزان.....بس صدقونى العجلة نامت وحدفت فجأة طب اعمل اي؟!!!المرة الأخيرة إلى الآن كنت داخل احط بنزين وملقتش البنزين اللى بستعمله فخرجت ولأن الشارع اتجاه واحد ولأن كان فيه 2 تاكسي ماشيين بسرعة كنت باصص ناحيتهم واذا بميكروباص جا عكسى وبسرعة لأ وإيه بإكصدام حديد دخل فى منتصف المقدمة وهشم الكبوت كله والريدياتير والسربنتينة (دى اللى هى المكثف بتاع التكييف) وحاجات تانية واهى العربية دلوقتى مرمية عند السمكرى وقاللى هستلمها بعد عشرين يوم ومش هدفع طبعا اقل من 3000 جنيه لأن السيد الوالد - ربنا يكرمه- قال للراجل اعملهالنا كلها بقة من قدام والجناب وورا كله من غير ما يرجعلى واتدبست والحمد لله

ايييييييييييييييييييه!!!! تفتكروا بعد كدة مفيش حاجة تانى هتحصل....انا عن نفسى مفتكرش لكن العربية دى اصبحت مصدر تشاؤم لكل الأسرة ....انتوا متخيلين فى سبع شهور خمس حوادث اتنين منهم قاتلة

الحمد لله وللحديث بقية