مش انا امبارح وبعد انتظار الفيلم ده سنتين أخيرا رحت مع (شهاب) فيلم أحلام حقيقية
انا اتصدمت
واضح ان دايما الحاجة اللى بيتعملها دعاية جامدة والناس تفضل قاعدة مستنياها فترة طويلة بتطلع أى كلام
زى بالضبط ما حصل لما الناس فضلت مستنية ألبوم (عمرو دياب) سنة 1998 بعد ما خد جايزة مونت كارلو عن (نور العين) وفضلنا مستنيين الكلام الجامد وبعدين اتفاجأنا بالبوم (عودونى) العادى جدا واللى انا شخصيا باعتبره من أسوأ البومات (عمرو دياب) وكذلك زى ما الناس فضلت مستنية مسلسل (فارس بلا جواد) بتاع الأستاذ (محمد صبحى) بعد الدعاية الرهيبة والتشويق الجامد ويطلع المسلسل عادى جدا ومفيهوش أى حاجة من التشويق اللى كنا منظرينه
ما علينا
أحلام حقيقية بيحكى عن إن (حنان ترك) اللى كانت بتحب (فتحى عبد الوهاب) واتجوزت (خالد صالح) بتحلم بجرايم قتل هى اللى بتنفذها وبتصحى تلاقى الجرايم تمت بالفعل ولأن (فتحى عبد الوهاب) مفتش مباحث وبيكرهها عشان ماتجوزوش نفسه يثبت عليها الجرايم دى ولكن (خالد صالح) زوجها بمساعدة (داليا البحيرى) صديقتها الأنتيم القريبة منها قوى بيساعدوها على البراءة وبيروحوا لخبيرة فى الطب النفسى (ماجدة الخطيب) عشان يفهموا تفسير للى بيحصل فالدكتورة بتعرفهم ان الناس القريبين من بعض ممكن يحصل بينهم توارد خواطر يؤدى لشعور واحد منهم باللى التانى بيعمله فى لحظة حدوثه وفى نفس الليلة بتموت الدكتورة وبيحقق نفس مفتش المباحث فى قضيتها بيتوصل هو للحقيقة فى نفس الوقت اللى كانت (حنان ترك)هتنتحر عشان تخلص من اللى هى فيه ولكنها بتفهم الحقيقة واللى هى عقدة الفيلم مبنية عليها إن (داليا البحيرى) هى القاتل الحقيقى و(حنان ترك) بتشوف الجرايم فى توارد خواطر معاها نظرا لقربهم من بعض
التصوير والتمثيل حلوين جدا والإخراج مقبول جدا لكن الموسيقى التصويرية مملة جدا إلى جانب الملل الرئيسى من طول رتابة الأحداث والفرش للنهاية اللى لا تتعدى 5 دقايق وقاعدين يفرشولها حوالى ساعة ونص
ياللا ...عموما هى مش أول ولا هتكون آخر مرة الواحد يتخم فيها كده
