رمضـــــــــــــــــــــان جــــــــــــــــانـــــــــــــــــــــا

(إذا جاء رمضان ...فتحت أبواب الجنة...وأغلقت أبواب النار...وأزلفت الشياطين)

(ليلة القدر خير من ألف شهر)

(كان الرسول إذا قارب شهر رمضان أكثر من دعاء واحد: اللهم بلغنا رمضان)

(لو علم الناس فضل شهر رمضان لتمنوا أن تكون السنة كلها رمضان)

(خاب وخسر...خاب وخسر...خاب وخسر....من أدركه رمضان ولم تغفر كل ذنوبه)

(رمضان إلى رمضان...مكفر لما بينهم)

كل ده كلام اتقال فى فضل شهر رمضان وانا لا اعتقد انه محتاج حتى لشرح أو تفصيل لأنه كله واضح ومبين قد ايه الشهر ده مينفعش يعدى كده بالساهل زى أى شهر غيره...الناس فى مصر فى رمضان تلاقيهم راكبين المواصلات وكل واحد تقريبا - من المسلمين طبعا- فى إيده مصحف ومعظم الناس مشغله قرآن كريم فى عربياتهم وساعة الفطار كل الناس قاعدة ساكتة وموائد الرحمن مليانة وغيره وغيره من الطقوس اللى بتميز رمضان عن بالقى الأشهر فى السنة الهجرية

التليفزيون بقة فى رمضان كأنه بينقل إرسال من كوكب تانى مفيهوش رمضان...تلاقى قبل الفطار فترة شغل الموظفين جايب حاجات رخمة أو بيعيد اللى كان جايبه الليلة اللى قبلها وبعد ميعاد رجوع الموظفين تلاقيه يا إما جايب الأفلام اللى الناس ريقها بينشف على ان التليفزيون يعرضها طول السنة يا إما جايب الأفلام اللى أحداثها تقريبا كلها بنات لابسة مايوهات وبعد الفطار خد عندك مسلسلات لحد ما تنام وانت بتتفرج والمسلسلات لعلمك هتبقى لسه مخلصتش

الجوامع فى رمضان زى ما يكون الأئمة بتوعها بينتقموا من الناس فى الصلاة ...طبعا كلنا عارفين ان بعد صلاة العشاء فيه صلاة التراويح واللى بتكون من 4 إلى 20 ركعة فى اليوم لكن فى المنطقة بتاعتى معظم الجوامع متفقة انها تكون 8 ركعات إلى جانب ركعتى الشفع وركعة الوتر....المهم...ييجى الإمام ويروح رازع الجزء كله فى الركعات الثمانية بمعدل ربع حزب فى الركعة بس المشكلة مش فى كده وانما المشكلة انه شايف نفسه صوته حلو وجميل وبيقسم مع ان الناس معظمها بيبقوا نايميين وراه أو بيهرشوا أو بيبصوا على حاجة...وهكذا

اللى انا عايز اقوله هنا أولا ان اللى عايز يطول فى القراءة لازم يكون متأكد ان صوته مميز وممتع مش مجرد بيقرأ وخلاص إلى جانب انه لازم يكون عنده حاسة فى تغيير نبرات صوته والإطالة أو التقصير وكل ما هو يشد المستمع ويخليه على طول صاحى معاه

ثانيا اللى فاكر نفسه منهم بيعود الناس على الوقفة فى الجامع والصلاة فيه...أحب اقوله ان سيادتك اللى بيصلى التراويح غالبا هو اللى أساسا برة رمضان بيصلى فى الجامع فهو مش محتاج ده والنسبة البسيطة اللى بتستنى لصلاة التراويح فى المسجدوهى بره رمضان مبتصليش فيه - أو مبتصليش خالص- دول مش هيتعودوا على وقفة الجامع دول ح يزهقوا مع أول ركعتين هيسلموا ويمشوا

ولذلك نرجو منهم الرأفة فى اللى جاى يصلى

وعموما لو الواحد يقدر يخلص فى العبادة في رمضان...والله يبقى كسب كتير جدا وربنا يوفقنا جميعا لما يحبه ويرضاه

ماذا تحتاج مصر لتتقدم

كانت مصر منذ بداية الحضارة الإنسانية ذات شأن لا يمكن إهماله إن لم تكن هى صاحبة الصدارة فى العالم ولكن لماذا لم نعد كذلك ولا نصفه ولاربعه ولا ثمنه والله يا عم ولا حتى 1% منه

وده لأن مصر بقى فيها شعب غريب الشكل والمضمون وعلشان يرجع على الأقل يبقى فى الطريق السليم من وجهة نظرى لازم شوية الحاجات دى تحصل

لازم السائقين تلتزم بالطريق الصحيح والطريقة الصحيحة فى القيادة

لازم الشرطة تفهم إن مفهوم (الشعب فى خدمة الشرطة) عمره ما كان موجود لا فى مصر ولا فى أى حتة تانية

لازم الناس تفهم إن مش معنى إنى عملت شغلى مضبوط يبقى لازم استنى مكافأة لأن الطبيعى إن الشغل يتنفذ صح ومعنى المكافأة إن الشخص قام بمجهود أو عمل غير طبيعى

لازم الناس تفكر إننا هنتحاسب على كل قرش كسبناه فاحنامش ناخد فلوس وخلاص لأ لازم نحس ان الفلوس اللى بناخدها دى نستحقها

لازم نفهم الفرق بين البقشيش والرشوة ودى من أهم النقط اللى مبهدلة البلد

لازم نفهم نجاح الدول اللى نجحت كان نتيجة سياسة ناجحة مش نتيجة شخص ناجح وانا هنا مش بقصد سياسة دولة ولكن باقصد نجاح اى مؤسسة او منشأة او حتى مدرسة او اى مكان

لازم الطالب يتعلم التربية مع التعليم مش مجرد حشو فى الدماغ وخلاص

لازم اللى بيرتكب غلطة يتعاقب عليها أيا كان اللى عملها مركزه أو فلوسه أو طبيعة عمله أو....كل الناس

لازم الأطفال والطلبة كلهم فى الحقيقة مش الأطفال بس لازم كلهم تتغير طريقة تعليمهم بحيث متبقاش المواد الدراسية حشو فى الدماغ -لامؤاخذة فى التعبير- بنروح نطرشه فى ورقة الإجابة وبعد كده ننساه لا بالعكس لازم نحبه لدرجة تخلينا نفضل فاكرينه ونستفيد منه إلى ابعد حد فى حياتنا الشخصية

لازم الناس تفهم ان ربنا متطلع علينا فى كل اللى بنعمله فياريت نعمل شغلنا بذمة شوية

وطبعا لازم الناس تفهم الغرض من الفلوس انها تعيشنى فى حالة مرضية مش الغرض من الحياة والعيشة انى افضل اجمع فلوس وخلاص...طب بالأمانة اسأل نفسك أو إسألى نفسك سؤال وخليك صريح فى إجابته: لو فضلت عايش بلم واجمع الفلوس لحد ما اموت..مين اللى هيعرف قيمة الفلوس ويستمتع بيها؟ انا ولا اللى هياخدها بعدى؟ يمكن الرد يخليك تفهم انا أقصد ايه بالنقطة دى

فيه حاجة حصلت امبارح اللى هو 29/07/2007 فكرتنى بحاجة لازم اكتبها وكنت ناسيها...انا مش هاقول اللى حصل لكن هادخل فى النقطة على طول....لازم نحترم المواعيد اللى بيننا والكلمة اللى بتخرج من بقنا بمعنى لما أبقى مش هأقدر أشوفك لازم اكون راجل واقولك مش هاقدر اشوفك مش اقعد اقولك طب هتأخر ساعة طب نص ساعة وحاجات من اللى تحرق الدم دى لحد ما فى الآخر اقولك معلش الوقت اتأخر وخليها يوم تانى...طب هو انا هأقتلك لو قولتلى من الأول انى مش هينفع النهاردة أشوفك....يا جماعة الراجل فى مصر مبقاش فاضله حاجة تثبت رجولته غير كلمته بجد بلاش نيجى على دى كمان

وفيه حاجات تانية كتير بس انا الحقيقة مش عايز اتطرق لمواضيع دينية او سياسية او اقتصادية عشان الموضوع ميوسعش منى قوى ومزعلش حد منى لكن والله الكلام اللى فات ده لو اتعمل بيه ممكن نتغير جدا